Tarantino yfir sig hrifinn af íslenskum áramótum

Kvikmyndaleikstjórinn Quentin Tarantino var ánægður með sína síðustu heimsókn til Íslands og var sérstaklega hrifinn af því hvernig við Íslendingar höldum upp á áramótin. Hann ætlar ekki að eyða áramótunum annarstaðar en á Íslandi hér eftir. Haft var eftir honum að hann hafi haft gaman af því að drekka alla nóttina á bar fullum af ofurfyrirsætum. Hitt er svo annað mál hvort þetta er sú landkynning sem Ferðamálaráð íslands stefnir að.

Konurnar drekka ákaft
Á vefsíðunni contactmusic.com kemur fram að Tarantino hafi löngum haft dálæti á Íslandi og þegar honum bauðst að koma hingað nýlega hafi hann ekki hikað við að þiggja boðið. „Ég get næstum ekki ímyndað mér áramótin annarstaðar héðan af. Því Íslendingar drekka eins og brjálæðingar öllu jafna en á gamlárskvöld missa þeir gjörsamlega vitið – sérstaklega konurnar og þær drekka ákaft,” sagði Tarantino.

Hann sagði: „Við fórum á næturklúbb sem var fullur af drukknum stúlkum og ein þeirra sagði mér að hún færi hjá sér þegar hún sæi hvað íslenskar stúlkur drekka mikið og haga sér eins og fífl. Hún hafði vart sleppt orðinu þegar drukkin stúlka gengur hjá og fellur beint á andlitið án þess að bera fyrir sig hendurnar, beint fyrir framan okkur.”

Tarantino: „Hvar hef ég verið alla mína ævi?"
„Ég var í herbergi fullu af ofurfyrirsætum sem voru útúrdrukknar, uppi á borðum, æpandi að nú þyrfti að hefja fjörið. Ég sagði við sjálfan mig: Hvar hef ég verið alla mína ævi?” Sagði Tarantino í viðtalinu.

Að lokum sagði hann: „Í Bandaríkjunum er hugmyndin sú að fylla stelpurnar til að geta komið þeim heim með sér. Á Íslandi reynir maður að koma stúlkunum heim með sér áður en þær verða of drukknar.”

Contactmusic.com

Tarantino sýndi áhorfendum í háskólabíói „drukkið box" í Kung-fu myndum. mbl.is/Kristinn

• Blogga um frétt