Yfirvöld í Mexíkó hafa uppgötvað leynigöng sem liggja frá ríkinu Sonora yfir landamærin til Arizona í Bandaríkjunum. Göngin fundust þegar lögregla var að skoða lagnir sem liggja yfir landamærin og tók eftir mun á yfirborði steypunnar á einum stað.
Við nánari athugun komu í ljós göng sem töldu 1,5 metra á mexíkósku landsvæði og meira en 30 metra Bandaríkjamegin. Helmingur ganganna var styrktur með viðarbitum en svo virðist sem göngin hafi verið í byggingu og ekki var búið að útbúa útgang á hinum endanum.
Yfirvöld beggja vegna landamæranna finna reglulega göng af þessu tagi, en þau eru gjarnan notuð til að smygla fíkniefnum og fólki yfir landamærin.
Í apríl síðastliðnum uppgötvuðu bandarísk yfirvöld lengstu göng sem hingað til hafa fundist. Þau voru notuð til að flytja fíkniefni milli landanna. Þau göng voru alls 800 metra löng.