Lögfræðingur einnar af fyrrverandi leyniskyttum Rodrigo Duterte, forseta Filippseyja, kærði í dag forsetann fyrir Alþjóða glæpadómstólnum í Haag.
Kæruna lagði filippeyski lögfræðingurinn Jude Sabio, fram gegn Duterte og stjórn hans og sakar hann þá að sögn Reuters-fréttastofunnar um glæpi gegn mannkyni í baráttu stjórnarinnar gegn fíkniefnasölu.
Segir í kærunni sem er 77 síðna löng, að Duterte hafi „ítrekað“ og „stöðugt“ framið glæpi gegn mannkyni og að undir hans stjórn hafi morð á meintum fíkniefnasölum og öðrum glæpamönnum orðið stöðluð venja.
Sabio er lögfræðingur Edgar Matobato, sem bar vitni fyrir filippseyska þinginu, að hann hefði verið í dauðasveitum sem störfuðu samkvæmt skipunum Dutertes.
Kæra Sabios byggir á vitnisburði Matobato og fyrrverandi lögreglumannsins Arturo Lascanas, vitnisburðum sem mannréttindasamtök hafa safnað saman, sem og frásögnum fjölmiðla af drápunum.
Í kærunni er fullyrt að Duterte og 11 hátt settir embættismenn í stjórn hans beri ábyrgð á morðunum og að þörf sé á rannsókn, handtökum og réttarhöldum.
Löggjafinn á Filippseyjum fann engar sannanir fyrir vitnisburði Matobatos fyrir filippseyska þinginu og talsmenn forsetans hafa fullyrt að frásagnir hans séu tómur hugarburður.
Tæplega 9.000 manns hafa verið myrtir á Filippseyjum frá því að Duterte tók við embætti síðasta sumar.
Lögregla fullyrðir að þriðjungur þeirra morða hafi verið framinn í sjálfsvörn við löggiltar lögregluaðgerðir. Mannréttindasamtök segja að tveir þriðju hluti morðanna hafi verið framin af fólki sem tekið hefur lögin í sínar hendur, eða af lögreglumönnum sem dulbúið hafa sig sem sjálfskipaða löggæslumenn.
Lögregla hefur alfarið hafnað slíkum ásökunum og Duterte hefur að sama skapi harðneitað öllum tengslum við dauðasveitir.