Erlent | AFP | 21.5.2019 | 7:08

Á tindi Everest í tvígang á 6 dögum

Kami Rita sést hér á toppi Everest í 23. skiptið í síðustu viku. AFP

Serpinn Kami Rita stóð á tindi hæsta fjalls heims í 23. skiptið fyrir sex dögum. Í dag var hann þar að nýju, nú í 24. skiptið. Ólíklegt er að þetta met verði slegið á næstunni en Kami Rita, sem er 49 ára gamall, hefur starfað sem leiðsögumaður í Nepal í rúma tvo áratugi.

„Þetta er sögulegt,“ segir yfirmaður fjallaferðaskrifstofunnar Seven Summit Treks, Mingma. Hann setti þetta met í morgun er hann fór með hóp af indverskum lögreglumönnum á topp Everest.

Kami Rita fór fyrst á tind Everest, sem er 8.848 metrar að hæð, árið 1994. Á þeim 25 árum sem liðin eru hefur hann farið í 35 leiðangra á fimm fjöll sem eru yfir 8 þúsund metrar að hæð. Þar á meðal K2 í Pakistan sem er annað hæsta fjall heims.

Í fyrra fór hann á Everest í 22. skiptið og setti þar með nýtt met í ferðum á hæsta tind heims. En fyrra metinu, 21 ferð, deildi hann með tveimur öðrum sjerpum sem báðir eru nú komnir á eftirlaun.

Þegar hann sneri til baka úr leiðangri númer 23 á Everest lá ljóst fyrir að hann ætlaði sér að fara upp í annað skiptið á þessu tímabili.

„Ég er afar glaður og stoltur. Ég á jafnvel von á því að fara á tindinn aftur á þessu tímabili,“ sagði hann í símtali við fréttamann AFP í liðinni viku. Kami Rita hefur oft sagt að það sé ekki markmið hans að setja met en sem leiðsögumaður sé það hluti af hans starfi að fara á Everest.

Everest er hæsta fjall heims. AFP

„Ég geri þetta ekki til þess að slá heimsmet. Ég er bara í vinnunni. Ég vissi ekki einu sinni að hægt væri að setja slík met,“ sagði hann í síðasta mánuði þegar hann lagði af stað í grunnbúðir Everest.

Frétt af mbl.is

Á tindi Everest í 23. skiptið

Aldrei hafa verið gefin út jafn mörg leyfi fyrir ferðum á Everest í Nepal en í ár en alls eru leyfin 378 talsins en hvert þeirra kostar 11 þúsund Bandaríkjadali, tæplega 1,4 milljónir króna. Flestir fara upp að vori og er talið að um 750 manns feti stíga fjallsins þetta vor þar sem flestir eru með sjerpa, líkt og Kami Rita, sem aðstoðarmenn við uppgönguna.

Síðan eru að minnsta kosti 140 að undirbúa ferð á Everest Tíbet-megin. Það er norðurhlið Everest sem er mun erfiðari. Alls náðu 807 á tind Everest í fyrra og var það nýtt met.

Indverskur fjallgöngumaður lést á Everest í síðustu viku og leit stendur yfir að írskum fjallgöngumanni sem rann og féll skammt frá toppi Everest nýverið. Sex erlendir fjallgöngumenn hafa látist á öðrum tindum í Himalaja-fjöllunum sem eru yfir átta þúsund metrar að hæð í ár og tveggja er saknað.