Neita að skila Chagos-eyjum

Stjórnvöld á eyjunni Máritíus saka Breta um að vera ólöglega nýlenduherra, eftir að bresk stjórnvöld hunsuðu sex mánaða frest sem Sameinuðu þjóðirnar höfðu veitt þeim til að skila Máritíus Chagos-eyjaklasanum. BBC greinir frá.

Bresk stjórnvöld segjast ekki viðurkenna kröfu Máritíus um eign eyjaklasans, en Bretar keyptu Chagos árið 1965 fyrir þrjár milljónir punda.

Stjórnvöld á Máritíus segjast hins vegar hafa neyðst til að láta eyjarnar af hendi í skiptum fyrir fullveldið sem þau öðluðust árið 1968.

Breska utanríkis- og samveldisráðuneytið segir Breta hins vegar hafa fullan rétt til eyjanna, en ein þeirra, Diego Garcia, hýsir bandaríska herstöð.

„Bretland efast ekki um eignarétt sinn á þessu bresk-indverska svæði sem hefur verið undir samfelldri stjórn Breta frá því árið 1814,“ sagði í yfirlýsingunni.

Það var í maí á þessu ári sem Allsherjarþing Sameinuðu þjóðanna ályktaði með miklum meirihluta atkvæða að Chagos-eyjum yrði skilað aftur til Máritíus. Tillagan naut stuðnings 116 ríkja, en einungis sex voru á móti.

Sögðu Sameinuðu þjóðirnar við þetta tilefni að afnýlenduvæðing Máritíus hafi ekki verið framkvæmd í anda réttar þjóða til sjálfsákvörðunar og þess vegna teldist stjórn Breta yfir Chagos óréttmæt.

Þremur mánuðum áður höfðu Sameinuðu þjóðirnar ráðlagt Bretum að skila eyjunum hið fyrsta.

• Blogga um frétt