Antony Blinken, utanríkisráðherra Bandaríkjanna, er kominn til Úkraínu þar sem hann mun fullvissa heimamenn um áframhaldandi stuðning Bandaríkjanna við landið og fleiri vopnasendingar.
Á sama tíma sækja rússneskar hersveitir fram í norðausturhluta Úkraínu og eru þær komnar inn í landamærabæinn Vovchansk, skammt frá næststærstu borg landsins, Karkív.
Ekki hafði verið tilkynnt opinberlega um heimsókn Blinkens. Hann kom til Úkraínu með lest frá Póllandi og mun á meðan á heimsókninni stendur funda með Volodimír Selenskí Úkraínuforseta.
Þetta verður fjórða heimsókn Blinkens til Úkraínu síðan Rússar réðust inn í landið í febrúar árið 2022.
Nokkrar vikur eru liðnar síðan Bandaríkjaþing samþykkti eftir miklar vangaveltur 61 milljarðs dollara hernaðaraðstoð fyrir Úkraínu.
Selenskí segist hafa sent hersveitir til aðstoðar í Karkív. Þúsundir almennra borgara hafa þurft að yfirgefa svæðið.