Sex bíla árekstur varð á Breiðholtsbrautinni um fimmleytið í dag, nærri Selásbraut.
Þrír voru fluttir á slysadeild eftir áreksturinn. Að sögn slökkviliðsins á höfuðborgarsvæðinu voru áverkar tveggja hinna slösuðu minni háttar, en eitthvað meiri áverkar voru á þeim þriðja.
Veginum var lokað í 40 mínútur eftir áreksturinn og urðu töluverðar umferðartafir á svæðinu á meðan.