Búið er að opna fyrir umferð um Reykjanesbraut og Grindavíkurveg að því er fram kemur á vef Vegagerðarinnar. Einnig hefur verið opnað fyrir umferð um Kjalarnes.
Aftakaveður hefur verið á Suðurlandi og suðvesturhluta landsins í dag. Veðrið er þó tekið að ganga niður á Reykjanesinu að sögn Veðurstofu Íslands, þó að enn sé verulega hvasst og þá eru skilin enn ekki gengin yfir á höfuðborgarsvæðinu.
Vegagerðin hefur lokað fjölmörgum vegum á landinu í dag, m.a. veginum um Sandskeið, Hellisheiði, Þrengsli og eins Suðurlandsvegi á milli Hvolsvallar og Víkur í Mýrdal. Þá hefur ekkert verið flogið innanlands og tafir orðið á millilandaflugi vegna lokunar Reykjanesbrautarinnar.
Uppfært 16:30 Búið er að opna fyrir umferð um Suðurlandsveg að Þrengslum og um Þrengslin Áfram er lokað á Hellisheiði, Mosfellsheiði og Lyngdalsheiði.