Vörður, fulltrúaráð sjálfstæðisfélaganna í Reykjavík, mótmælir harðlega þeim áformum meirihluta borgarstjórnar Reykjavíkur að lækka hámarkshraða á öllum götum í umsjá borgarinnar.
Skipulags- og samgönguráð Reykjavíkurborgar samþykkti á miðvikudag nýja áætlun um hámarkshraða á götum borgarinnar. Með henni verða nær allar götur með 40 kílómetra hámarkshraða eða lægri.
Í yfirlýsingu Varðar segir að reynslan hafi sýnt að þegar þrengt sé að umferð á tengibrautum og stofnleiðum leiti umferð frekar inn í íbúðahverfin og það verði til þess að umferðaröryggi allra vegfarenda sé ógnað. Tekið er dæmi um þrengingu Hofsvallagötu árið 2014 en þá fjölgaði ökutækjum um 1.000 á sólarhring í nærliggjandi íbúðagötum, að því er fram kemur í Morgunblaðinu í dag.