Flogið tvisvar í viku til Kaupmannahafnar frá Akureyri

Kristján Þór Júlíusson bæjarstjóri bendir á
Kristján Þór Júlíusson bæjarstjóri bendir á "höfuðborg hins bjarta norðurs" eins og hann nefndi Akureyri og Birgir Jónsson framkvæmdastjóri Iceland Express bendir á Kaupmannahöfn. mbl.is/Skapti

Beint áætlunarflug Iceland Express frá Akureyri til Kaupmannahafnar hefst þann 30. maí næstkomandi. Frá þeim degi og fram á haustið verður flogið tvisvar í viku milli Akureyrar og Kaupmannahafnar, á þriðjudögum og fimmtudögum. Þessar fyrirætlanir flugfélagsins voru kynntar á Akureyri í dag.

„Forsvarsmenn Iceland Express búast við því að Akureyringar og Norðlendingar taki þessari nýbreytni fagnandi, enda verður nú jafnvel ódýrara að fljúga til Kaupmannahafnar en Reykjavíkur," að því er segir í fréttatilkynningu frá Iceland Express.

Grunnverð farmiða milli höfuðstaða Norðurlands og Danmerkur er það sama og á öllum leiðum Iceland Express, 7.995 kr. aðra leiðina og hefst sala í byrjun næstu viku.

Flogið verður í samskonar flugvélum og notaðar eru á öðrum leiðum félagsins.

Önnur nýbreytni er sú að farmiðakerfi Iceland Express gerir farþegum frá Akureyri til Kaupmannahafnar kleift að fljúga til landsins frá öðrum áfangastöðum Iceland Express í Evrópu ef það hentar þeim eða lenda í Keflavík á heimleiðinni ef þeir vilja. Einnig er hægt að fljúga út frá Keflavík og lenda á Akureyri þegar heim er komið, að því er segir í fréttatilkynningu.

mbl.is
Fleira áhugavert
Fleira áhugavert