Leikkonan Angelina Jolie segist stefna að því að ættleiða fleiri börn en hún á þegar tæplega tveggja ára son sem hún ættleiddi frá Kambódíu.
„Ég á örugglega eftir að ættleiða fleiri börn. Mig hefur aldrei langað til að eignast mín eigin börn. Mér finnst vera það mörg börn sem þarfnast heimila í heiminum að það sé réttara að sjá fyrir þeim. Sumt fólk er fætt til að fæða börn en aðrir byggja fjölskyldur sínar á annarra börnum. Ég er ein þeirra," segir hún. Þá segist hún vonast til þess að ættleiða börn víðs vegar að úr heiminum og ala þau upp sem systkini.