Nennti ekki fram úr

Spænski töffarinn Enrique Iglesias var púaður niður af þúsundum áhangenda í austurríska skíðastaðnum Ischgl þegar hann mætti klukkutíma of seint á tónleika og hermdi síðan eftir lögum sínum sem leikin voru af bandi. Og hvers vegna kom hann of seint? Hann vildi lúra aðeins lengur! Svo þurfti hann líka að fara tvisvar í sturtu. Eins gott að vera hreinn á kroppinn þegar hreyfa á varirnar fyrir 15 þúsund manns. Þegar hann ætlaði að tala við áheyrendur kom hann laglega upp um sig því ekkert heyrðist enda slökkt á hljóðnemanum. Þeir hjá Ischgl hafa viðurkennt að Enrique söng ekki í alvöru en segja góða ástæðu fyrir því. "Fyrir þá sem ekki eru vanir þunnu loftinu í álíka hæð yfir sjávarmáli, getur verið mjög erfitt að anda, hvað þá syngja." Aðrir vilja þó meina að Enrique kunni bara ekkert að syngja en ætti þó allavega að geta lært að haga sér.