Gunnar Heiðar til Eyjamanna

Gunnar Heiðar Þorvaldsson, knattspyrnumaður frá Vestmannaeyjum, hefur samið við ÍBV og verður löglegur með liðinu frá og með 15. júlí en hann hefur undanfarið ár spilað með Häcken í sænsku úrvalsdeildinni.

Þetta kemur fram í fréttatilkynningu sem ÍBV sendi frá sér rétt í þessu. Gunnar nær ekki næsta deildaleik ÍBV sem er gegn ÍA 12. júlí en verður orðinn löglegur þegar Eyjamenn fá Fjölni í heimsókn sunnudaginn 19. júlí.

Gunnar Heiðar er 33 ára gamall Eyjamaður og lék með ÍBV frá 1999 til 2004 þar sem hann skoraði 37 mörk í 72 leikjum í efstu deild.

Hann lék með Halmstad í Svíþjóð 2004 til 2006 og varð þar markakóngur sænsku úrvalsdeildarinnar árið 2005. Þaðan fór hann til Hannover í Þýskalandi, Vålerenga í Noregi, Esbjerg í Danmörku, Reading á Englandi og Fredrikstad í Noregi.

Árið 2011 kom Gunnar aftur til Svíþjóðar og lék með Norrköping í hálft þriðja ár þar sem hann skoraði 34 mörk í 70 leikjum í úrvalsdeildinni. Hann varð annar markahæsti leikmaður úrvalsdeildarinnar árið 2012 með 17 mörk.

Haustið 2013 gekk hann til liðs við Konyaspor í Tyrklandi og lék þar eitt tímabil en kom til Häcken á miðju tímabili 2014 og hefur spilað þar síðan.

Gunnar á að baki 24 A-landsleiki fyrir Íslands hönd og hefur skorað í þeim 5 mörk. Þá lék hann 15 leiki með yngri landsliðum Íslands.

• Blogga um frétt