KR og Fjölnir eigast við í frestuðum leik frá því í 10. umferð í Pepsi-deild karla í knattspyrnu á Alvogenvellinum í Frostaskjóli í kvöld.
Leikur liðanna verður barátta um 5. sætið í deildinni. Fjölnir er í sjötta sæti deildarinnar með 15 stig en KR er með 14 stig í 9. sætinu. Sigurliðið úr leiknum í kvöld kemst upp fyrir KA sem er með 15 stig í 5. sæti deildarinnar.
KR vann góðan 3:0 útsigur gegn Víkingi um síðustu helgi og Fjölnir vann sinn annan leik í röð þegar það hafði betur á móti ÍBV í Grafarvogi, 2:1.
Flautað verður til leiks klukkan 19.15 og verður fylgst með gangi mála í leiknum hér á mbl.is.