Englandsmeistarar Leicester City sem taka á móti Liverpool í ensku úrvalsdeildinni í knattspyrnu í kvöld er eina liðið í fimm efstu deildunum á Englandi sem ekki hefur skorað mark í deildakeppninni á árinu 2017.
Leicester hefur tapað fimm deildarleikjum í röð án þess að skora mark en sá síðasti til að skora fyrir liðið í deildinni var Islan Slimani þegar hann tryggði Leicester 1:0 sigur á móti West Ham á 20. mínútu í leik liðanna á gamlársdag.
Eftir úrslit helgarinnar eru meistararnir komnir í fallsæti og þurfa sigur gegn Liverpool í kvöld til að komast upp úr því.