Eigendur West Ham mjög áhyggjufullir

Eigendur West Ham munu ræða framtíð króatíska knattspyrnustjórans Slaven Bilic hjá félaginu en staða hans er afar slæm eftir 3:0-tap liðsins gegn Brighton á heimavelli hamranna í gær í Lundúnum.

Eigendurnir, David Sullivan og David Gold, eru þekktir fyrir að standa með knattspyrnustjórum sínum en eru sagðir samkvæmt heimildum Sky Sports vera mjög áhyggjufullir með gang mála eftir tapið í gær.

Samningur Bilic rennur út undir lok þessarar leiktíðar en Sullivan lét hafa það eftir sér að það væri „siðferðislega rangt“ að reka knattspyrnustjóra og vildi veita honum tækifæri á að klára samning sinn.

Eftir tapið í gær sagði Bilic það vera „mjög erfitt fyrir mig að segja eitthvað snjallt núna fyrir utan það að um mikil vonbrigði er að ræða. Ég tek sem knattspyrnustjóri fulla ábyrgð.“

• Blogga um frétt