Portúgalski knattspyrnumaðurinn Bruno Fernandes segist þurfa að íhuga framtíð sína eftir Evrópumótið í Þýskalandi í sumar.
Fernandes, sem er fyrirliði United, hefur verið besti leikmaður félagsins síðan hann gekk til liðs við United í janúar 2020 frá Sporting Lissabon.
United-liðið hefur engan veginn staðið undir væntingum í ár en það situr sem er í sjötta sæti deildarinnar með 54 stig.
Í viðtali við DAZN í Portúgal gaf Fernandes það í skyn að hann væri ekki staðfastur á því hvort hann yrði hjá United á næsta tímabili eða ekki.
„Tímabilið hefur verið vonbrigði en við getum enn unnið enska bikarinn. Eftir það hefst Evrópumótið.
Ef ég á að vera alveg hreinskilinn þá verð ég að hugsa um hvort ég vilji vera áfram í ensku úrvalsdeildinni eftir Evrópumótið. Það er ekkert mikilvægara en það og úrslitin í bikarnum þessa stundina,“ sagði Portúgalinn.