Giorgio Chiellini, varnarmaðurinn reyndi í liði Juventus og ítalska landsliðsins í knattspyrnu, á það á hættu að missa af fyrri leik Juventus og Real Madrid í átta liða úrslitum Meistaradeildarinnar.
Chiellini varð fyrir meiðslum í markalausu jafntefli Juventus gegn SPAL í ítölsku A-deildinni og af þeim sökum hefur hann dregið sig út úr landsliðshópnum fyrir vináttuleikina gegn Argentínumönnum og Englendingum sem fram fara í kringum næstu helgi.
Fyrri leikur Juventus og Real Madrid í átta liða úrslitum Meistaradeildarinnar fer fram 3. apríl á heimavelli Juventus og hann gæti orðið í kapphlaupi við tímann að ná sér góðum af meiðslunum fyrir þann leik.