París Saint-Germain hefur ákveðið að víkja Christophe Galtier úr starfi knattspyrnustjóra karlaliðsins eftir eitt ár við stjórnvölinn.
Undir stjórn Galtier varð PSG Frakklandsmeistari en á þeim bænum er það ekki viðunandi árangur þar sem stærsti titilinn, Meistaradeild Evrópu, rann liðinu úr greipum enn á ný.
Var PSG raunar ekki nálægt því að vinna Meistaradeildina á þessu tímabili þar sem liðið féll úr leik í 16-liða úrslitum eftir tvö töp fyrir Bayern München.
Það voru forráðamenn félagsins ekki sáttir við og leita nú að nýjum knattspyrnustjóra.
Julian Nagelsmann, sem stýrði einmitt Bayern í leikjunum tveimur gegn PSG, hefur verið orðaður við stöðuna.