Afturelding vann bikarinn í fyrsta sinn

Afturelding sigraði á síðasta mótinu í bikarmótaröð Taekwondosambands Íslands sem haldið var í Keflavík um helgina og unnu Mosfellingar um leið heildarstigakeppni keppnistímabilsins.

Þetta er í fyrsta skipti sem Afturelding verður bikarmeistari. María Guðrún Sveinbjörnsdóttir úr Aftureldingu og Leo Speight úr Björk voru valin bestu keppendur mótsins en þau unnu bæði til gullverðlauna í sínum flokki.

Þátttakendur á mótinu voru rúmlega 130 frá tíu félögum. Keflvíkingar urðu í öðru sæti í heildarstigakeppni bikarmótaraðarinnar og Ármenningar höfnuðu í þriðja sæti.

Meðfylgjandi myndir eru frá mótinu um helgina.