Lokamót Eimskipsmótaraðarinnar í golfi, Goðamótið, hófst á Jaðarsvelli á Akureyri í morgun, en spilaðar eru 36 holur í dag og 18 á morgun og er fyrsta hring nú lokið.
Í karlaflokki er spennan mikil en fjórir kylfingar eru efstir og jafnir á 70 höggum eða 1 undir pari. Þetta eru þeir Gísli Sveinbergsson og Björgvin Sigurbergsson úr Golfklúbbnum Keili, Andri Már Óskarsson úr Golfklúbbi Hellu og Bjarki Pétursson úr Golfklúbbi Borgarness.
Í kvennaflokki er spennan ekki minni en þrír kylfingar deila þar efsta sætinu á 74 höggum, 4 yfir pari. Þetta eru þær Tinna Jóhannsdóttir úr Golfklúbbnum Keili, Karen Guðnadóttir úr Golfklúbbi Suðurnesja og Ragnhildur Kristinsdóttir úr Golfklúbbi Reykjavíkur.