Íslenskir handknattleiksmenn komu mikið við sögu þegar Skjern og Århus skildu jöfn, 29:29, í dönsku úrvalsdeildinni í kvöld en leikið var á heimavelli Skjern. Árósaliðið hafði yfirhöndina í hálfleik, 17:15, en Skjern-liðið náði að komast yfir undir lokin en það dugði ekki til þess að vinna leikinn.
Tandri Már Konráðsson skoraði fimm mörk fyrir Skjern auk þess að vera umsvifamikill í vörninni að vanda.
Ómar Ingi Magnússon átti stórleik og skoraði átta mörk fyrir Århus-liðið. Hann var jafnframt markahæstur. Sigvaldi Guðjónsson skoraði fimm mörk og Róbert Gunnarsson eitt mark.
Skjern situr í þriðja sæti dönsku úrvalsdeildarinnar með 17 stig og er þremur stigum á eftir lærisveinum Arons Kristjánssonar í Aalborg sem tróna á toppnum. Århus er í 8. sæti af 14 liðum deildarinnar.