Hefur skoraði tíunda hvert mark á HM

Guðjón Valur Sigurðsson er markahæsti leikmaður Íslands á heimsmeistaramóti. Hann bætti átta mörkum í safnið í gær og hefur þar með skorað 291 mark. Það er rétt rúmlega tíunda hvert mark sem íslenska landsliðið hefur skorað í 116 leikjum á HM frá fyrsta leiknum fyrir 59 árum, en eftir leikinn við Angóla í gær eru mörk Íslands á HM 2.874.

Gunnlaugur Hjálmarsson skoraði fyrsta mark Íslands á HM 1958 gegn Tékkóslóvakíu í 27:17 tapleik. 

Guðjón Valur er einnig leikja- og markahæsti leikmaður Íslands á Evrópumótum.

Guðjón Valur er nú sá íslenski handknattleiksmaður sem leikið hefur flesta landsleiki á heimsmeistaramóti í karlaflokki. Hann hefur nú leikið 54 leiki í röð. Fyrsti leikur hans á HM var gegn Svíum í Montpellier 23. janúar 2001. Síðan hefur Guðjón Valur ekki misst úr leik. Fyrra leikjamet átti Ólafur Stefánsson, 53 leiki, en hann lék sinn síðasta HM-leik gegn Króötum 28. janúar 2011 í Malmö-Arena á HM í Svíþjóð.

Tímamótasigur í Metz

Sigur íslenska landsliðsins á Angóla í gær var fimmtugasti sigur landsliðsins á heimsmeistaramóti. Tapleikirnir eru 60 og jafnteflin sex. Fyrsti sigur Íslands á HM var á landsliði Rúmeníu í Hermann-Giesler-Halle í Magdeburg 1. mars 1958, 13:11. FH-ingurinn Ragnar Jónsson varð markahæstur með fimm mörk. Gunnlaugur Hjálmarsson var næstur með fjögur mörk, Birgir Björnsson skoraði tvö mörk og Bergþór Jónsson og Einar Sigurðsson skoruðu eitt mark hvor.