Flugleiðir hf. og eigendur fraktflugfélagsins Bláfugls hf. hafa unnið að samningum um kaup Flugleiða á Bláfugli og tengdu félagi. Fram kemur í tilkynningu til Kauphallar Íslands, að stjórn Flugleiða fjalli um samningsdrögin í dag.
Bláfugl hefur verið með fimm B737-300-fraktvélar í rekstri og boðaði um mánaðamótin að Boeing 757-200 fraktflugvél yrði bráðlega tekin í notkun. Yfir 80% af starfsemi Bláfugls eða Bluebird Cargo fer fram erlendis en rekstrinum er stjórnað frá höfuðstöðvunum á Keflavíkurflugvelli. Starfsmenn Bláfugls eru nú 49 og þar af 28 flugmenn. Meirihluti flugstjóranna er þýskur en flestir flugmenn íslenskir.