Gengi krónu hefur lítið breyst það sem af er degi en fyrr í morgun greindi bankastjórn Seðlabankans frá því að stýrivextir bankans verði óbreyttir. Öllu meiri óvissa ríkir um þau skilaboð sem Seðlabankinn sendir í Peningamálum. Þau birtast á vef bankans kl.11 og á sama tíma hefst blaðamannafundur þar sem ákvörðun bankans er rökstudd og helstu niðurstöður Peningamála kynntar, að því er segir í Morgunkorni Glitnis. Greining Glitnis telur að tónn bankans verði áfram allharður og að sá stýrivaxtaferill sem bankinn spáir nú verði keimlíkur þeim sem birtist í mars. Samkvæmt þeim ferli hefur Seðlabankinn vaxtalækkunarferli í nóvemberbyrjun og verða nafnvextir bankans komnir niður í tæp 10% í lok næsta árs.
„Ýmsir þættir vinna með verðbólgumarkmiði Seðlabankans þessa dagana, og má þar meðal annars nefna stöðnun í landsframleiðslu á 1. fjórðungi ársins og fyrirsjáanlegan niðurskurð aflaheimilda, sem kæla mun hagkerfið nokkuð. Á móti koma þættir sem auka við verðbólguþrýsting, og er þar helst að nefna líflegan fasteignamarkað og merki um að einkaneysla hafi aukist að nýju á vordögum. Þessir þættir vegast á og mun niðurstaða Seðlabankans að okkar mati verða sú að breyta lítið fyrri spá um stýrivexti," samkvæmt Morgunkorni Glitnis.