Microsoft eignast Minecraft

Minecraft hefur náð mikilli útbreiðslu á umliðnum árum en í leiknum eru spilaranum gefnar frjálsar hendur til að byggja upp eigin veröld. Verja þeir því margir dágóðum fjölda klukkustunda á dag í leiknum.

Það er þessi fjöldi spilara og þessi hollusta þeirra við Minecraft sem Microsoft sér hag í. Þannig hyggst fyrirtækið lokka þennan stóra hóp spilara til Xbox One leikjatölvunnar, sem Microsoft framleiðir, en sala á henni hefur verið undir væntingum.

Meira en fimmtíu milljón eintök hafa selst af Minecraft frá því fyrsta útgáfa tölvuleiksins var gefin út árið 2009.