Gríðarleg viðskipti hafa verið með kröfur á slitabú Landsbankans (LBI) það sem af er ári. Til viðbótar við kaup á Icesave-kröfu Seðlabanka Hollands þá hafa erlendir vogunarsjóðir keypt samþykktar forgangskröfur á LBI fyrir yfir 80 milljarða að nafnvirði á árinu.
Þetta sýnir ný kröfuhafaskrá LBI sem Morgunblaðið hefur undir höndum. Vogunarsjóðir hafa ekki síður verið stórtækir kaupendur að almennum kröfum. Burlington Loan Management, vogunarsjóður sem er stærsti einstaki kröfuhafi föllnu bankanna, hefur þar verið fyrirferðarmikill á árinu og á nú almennar kröfur á LBI fyrir um 50 milljarða að nafnvirði.