Erlend greiðslukortavelta hér á landi var 7,1 milljarðar króna í október sem er 1,5 milljarða króna aukning frá sama mánuði í fyrra. Á síðustu 12 mánuðum hefur erlend greiðslukortavelta aukist um 28%. Þetta kemur fram í greiningu Rannsóknaseturs verslunarinnar.
Hæstu upphæðum í október vörðu erlendir ferðamenn á hótelum og gistihúsum, 1,4 milljarði króna sem er 35,5% hærri upphæð en í sama mánuði í fyrra. Ferðamenn vörðu álíka upphæð í ýmsa ferðaþjónustu en sá liður hefur aukist mest frá október í fyrra eða um 75%. Undir þann lið falla meðal annars skoðunarferðir, hvalaskoðun og aðrar skipulagðar ferðir.
Hver erlendur ferðamaður greiddi að jafnaði með greiðslukorti sínu fyrir um 107 þúsund krónur í október sem er 2% hærri upphæð en í október í fyrra. Leiðrétt fyrir verðhækkunum síðustu 12 mánaða var var raunveltan álíka há og í fyrra.
Ferðamenn frá Sviss keyptu að jafnaði fyrir hæstu upphæðir með greiðslukortum.
Kortavelta útlendinga sem kaupa farmiða eða pakkaferðir til Íslands frá heimalandi sínu eru ekki meðtaldar nema kortaveltan fari í gegnum íslenska færsluhirða. Þannig eru erlendar greiðslur vegna flugferða hingað til lands og greiðslur til erlendra ferðaskrifstofa eða annarra milliliða ekki meðtaldar.