Hótel Búðir á Snæfellsnesi er efst á lista Financial Times yfir 10 afskekkta gististaði sem blaðið mælir með til að komast frá öllu saman. Gististaðir í Sviss, Kína, Namibíu, Botsvana, Vanuatu, Bandaríkjunum, Mongólíu, Marokkó og á Páskaeyju eru einnig á lista blaðsins.
Blaðamenn FT segja að Hótel Búðir sé mögulega eina raunverulega strandhótelið á Íslandi sem liggi rétt hjá hrauni og sé með útsýni yfir Snæfellsjökul. Á sumarkvöldi, þegar eldur er kveiktur á ströndinni og hótelgestir stinga sér til sunds, sé staðurinn óraunverulegur.