Vodafone ætlar í ár að byggja upp háhraða 4G samband á öllum helstu fiskimiðum landsins, samkvæmt fréttatilkynningu.
„Uppbygging 4G dreifisvæðis Vodafone á haf út er þegar hafin og nær 4G svæði félagsins þegar út á hafsvæði frá Reykjanesi og austur fyrir Vík í Mýrdal.
Á árinu verður sérstök áhersla einnig lögð á hafflötinn út af Norðausturlandi, Austurlandi og Norðvesturlandi. Uppbyggingin er unnin í samstarfi við viðskiptavini Vodafone í sjávarútvegi þar sem þarfir útgerða og sjómanna eru hafðar að leiðarljósi.
Hefur þetta þegar skilað sér í nýjum viðskiptavinum úr sjávarútvegi eins og Samherja og Vinnslustöðinni, Bergi og Auðbjörgu,“ segir í fréttatilkynningu frá Vodafone.
Á meðal svæða þar sem langdrægir 4G sendar hafa verið gangsettir að undanförnu sem hafa það sérstaka hlutverk að bæta háhraðasamband út á hafi má nefna Háfell við Vík og Þorbjarnarfell við Grindavík.
Áður hefur langdrægur sendir verið virkjaður í Bláfjöllum en sá dreifir 4G sambandi suður af landi yfir miðin á milli Þorlákshafnar og Vestmannaeyja. Auk þess hefur langdrægur 4G sendir á Bolafjalli einnig dreift háhraðasambandi yfir miðin vestur af Bolungarvík og út á Djúp frá því í vetur.