Harpa, Stúdío Ólafs Elíassonar og Höfuðborgarstofa kalla eftir tillögum að listaverkum sem nýta sér ljósahjúp Hörpu með frumlegum hætti.
Eitt verk verður valið og sýnt á Vetrarhátíð í Reykjavík dagana 4. til 7. febrúar 2016.
Samkeppnin er opin öllum sem vinna með ljós eða list í einhverju formi. Verðlaunaféð er tvö hundruð þúsund krónur og verður vinningstillagan kynnt í fjölmiðlum þar sem höfundar verður getið.
Verkefnið á sér fyrirmynd frá Menningarnótt 2014 þegar þeir Atli Bollason og Owen Hindley settu upp gagnvirka listaverkið PONG á glerhjúpi Hörpu.
Á Sónar 2015 var annað ljósaverk kynnt sem byggt var á nýrri tækni sem umbreytti hljóðmerkjum í ljós og þýddu tónlist Sónar í síbreytileg mynstur á hjúpi Hörpu.
Í tilkynningu segir að með verkefninu sé kominn fram nýr og stærri vettvangur fyrir stafræna list í Reykjavík sem er ætlað að marka Reykjavík sess sem framsækinni höfuðborg á sviði tækni og lista.
Umsóknarfrestur er til og með 23. desember 2015. Nánari upplýsingar má nálgast á heimasíðu Hörpu undir harpa.is/ljosverk