Fjárfestar setja 650 milljónir í Mint Solution

Íslensk-hollenska hátæknifyrirtækið Mint solutions tilkynnti í dag um 650 milljóna fjárfestingu í fyrirtækinu, en hópur núverandi eigenda auk hollensks fjárfestingasjóðs standa á bak við fjárfestinguna núna. Áður hafði fyrirtækið fjármagnað sig tvisvar, samtals upp á 5,5 milljónir evra eða um 715 milljónir króna.

Gauti Þór Reynisson, framkvæmdastjóri Mint, segir í samtali við mbl.is að fjármögnunin núna sé hugsuð til að stíga næstu skref í sölu- og markaðsstarfi fyrirtækisins. Fyrirtækið var stofnað árið 2009 og hefur síðan þá unnið að þróun lyfjaöryggiskerfisins MedEye. Kerfið bætir lyfjaöryggi á sjúkrahúsum og öðrum heilbrigðisstofnunum með því að gera hjúkrunarfræðingum kleift að skanna öll lyf sjúklinga, rétt áður en þau eru gefin. Þannig er tryggt að lyfjagjöf sé í samræmi við lyfseðil og fyrirmæli lækna.

Frétt mbl.is: Fjárfest í Mint fyrir 700 milljónir

Öll þróunarvinna fer fram á Íslandi. Fyrirtækið er nú með 18 starfsmenn, níu hér á landi og níu í Hollandi, sem er stærsti markaður þess. Með fjárfestingunni stefnir Mint Solutions á frekari landvinninga á alþjóðlegum mörkuðum, m.a. í Belgíu, Bretlandi og Bandaríkjunum. Nýsköpunarsjóður atvinnulífsins fjárfesti í félaginu árið 2011 og hefur fylgt fjárfestingunni eftir síðan þá.

Gauti segir að stærstu hluthafar í fyrirtækinu eftir fjármögnunina núna séu félögin LSP, Seventure Partners og Nýsköpunarsjóður atvinnulífsins, sem öll höfðu áður fjárfest í félaginu. Til viðbótar bætist BOM Capital í Hollandi sem leiddi þessa fjárfestingu. Auk þess eiga starfsmenn og stofnendur hlut í fyrirtækinu, en fyrrnefndu fjórir sjóðirnir eiga stærstan hlut að sögn Gauta.

MedEye er notað á sjúkrahúsum og heilbrigðisstofnunum til að koma í veg fyrir ranga lyfjagjöf. Mynd/Mint Solutions

MedEye er komið í notkun á fjórum hollenskum sjúkrahúsum og verið er að innleiða kerfið á þremur til viðbótar.  Í tilkynningunni er haft eftir Gauta að MedEye hafi nú þegar sannað gildi sitt og komið í veg fyrir fjölda lyfjamistaka.

„Sem dæmi hefur Deventer-sjúkrahúsið í Hollandi verið með MedEye í notkun síðan í ágúst á síðasta ári og kerfið er nú notað við öll 250 sjúkrarúm spítalans. Á þessum tíma höfum við komið í veg fyrir yfir þúsund rangar lyfjagjafir.“

Viðræður standa nú yfir við mörg stærstu sjúkrahús Hollands, þar á meðal háskólasjúkrahús. Gauti segir því von á fleiri góðum fréttum af fyrirtækinu. Gauti segir við mbl.is að á endanum sé svo stefnt inn á Bandaríkjamarkað með vöruna. Segir hann að hingað til hafi uppbyggingaráform gengið eftir að stærstum hluta og horft hafi verið til þess að vera með fullþróaða vöru og fara inn á fleiri markaði á þessum tímapunkti. Það hafi tekist. „Svo eru stærri skref á næstu árum. Við erum ekki hætt að stækka eða leita að fjármagni,“ segir Gauti.

• Blogga um frétt