152,2 milljóna Bandaríkjadala tap var skráð vegna álversverkefnisins í Helguvík í ársfjórðungstölum Century Aluminum fyrir síðasta ársfjórðung síðasta árs. Century Aluminum er móðurfélag Norðuráls.
Greint var frá þessu á Kjarnanum í gær og segir þar að með þessu sé orðið formlega ljóst að uppbygging á álveri í Helguvík verði ekki að veruleika. Vitnað er í alþjóðlegan gerðardóm sem féll fyrir jól, sem komst að þeirri niðurstöðu að HS Orka þyrfti ekki að standa við ákvæði raforkusamnings sem fyrirtækið undirritaði við Norðurál Helguvík árið 2007.
Í grein Kjarnans kemur fram að sá samningur hafði verið um hluta af þeirri orku sem átti að nota í álverinu, en í mjög langan tíma hefur HS Orka reynt að losna undan samningnum, enda verið staðfest að hann gæti ekki skilað fyrirtækinu arðsemi.
Þá er einnig bent á að forstjóri HS Orku og forstjóri Landsvirkjunar hafi sagt að heimsmarkaðsverð á áli þyrfti að hækka um tugi prósenta til þess að álver í Helguvík myndi bera sig.