Lífeyrissjóðirnir auki við erlendis

Stjórnarráðshúsið við Lækjartorg.
Stjórnarráðshúsið við Lækjartorg. mbl.is/Jim Smart

Lífeyrissjóðirnir þurfa að auka vægi erlendra eigna og gera grein fyrir því hvernig þeir greina atkvæði á hluthafafundum hjá þeim félögum sem þeir fjárfesta í. Þetta er meðal þess sem kemur fram í skýrslu um umsvif lífeyrissjóða í íslensku efnahagslífi. 

Forsætisráðherra skipaði starfshóp í sumar til að skoða hlutverk lífeyrissjóða í uppbyggingu atvinnulífs. Viðfangsefnið var hvaða efnahagslegu og samkeppnislegu hættur fælust í víðtæku eignarhaldi lífeyrissjóða í atvinnufyrirtækjum. Einnig hvort æskilegt væri að setja reglur eða gera lagabreytingar um eignarhald og aðkomu lífeyrissjóða að stjórnun atvinnufyrirtækja. 

Þá skilaði Hagfræðistofnun greinargerð og Landslög álitsgerð um samkeppnisleg áhrif af víðtæku eignarhaldi lífeyrissjóða í atvinnulífinu. 

Starfshópurinn leggur eftirfarandi til:

  • Lífeyrissjóðir marki fjárfestingarstefnu til langs tíma og stefni að því að auka vægi erlendra eigna til að draga úr áhættu.
  • Lífeyrissjóðir séu skyldugir til að móta stefnu um stjórnarhætti lífeyrissjóða sem eigenda í atvinnufyrirtækjum.
  • Lífeyrissjóðum sé gert skylt að birta að minnsta kosti árlega skýrslu með upplýsingum um samskipti við félög sem þeir fjárfesta í og um hvernig þeir greiða atkvæði á hluthafafundum

Þá er stjórnvöldum ráðlagt að skoða hvort breytingar á lögum þannig að einstaklingar fái auknar heimildir til að ráðstafa viðbótarlífeyrissparnaði til húsnæðissparnaðar og jafnframt að sjóðfélagar geti ráðstafað 3,5% af 15,5% lágmarksiðgjaldi í séreign eða til húsnæðissparnaðar að eigin vali. 

Enn fremur sé mikilvægt að stuðla að samkeppni milli lífeyrissjóða þar sem það á við og lög um starfsemi þeirra þurfi að endurspegla breytingar er varða stjórnarhætti sem hafa orðið á lögum um fjármálafyrirtæki og lögum um vátryggingafélög. 

Í starfshópnum sátu Gunnar Baldvinsson, formaður, framkvæmdastjóri Almenna lífeyrissjóðsins, Áslaug Árnadóttir, lögmaður og Eggert Benedikt Guðmundsson, verkfræðingur. 

mbl.is
Fleira áhugavert
  ISK
  USD
  EUR
  GBP
  CAD
  DKK
  NOK
  SEK
Fleira áhugavert
  ISK
  USD
  EUR
  GBP
  CAD
  DKK
  NOK
  SEK