Hlutabréfaverð í Skeljungi hefur hækkað mikið í morgun eftir að félagið birti jákvæða afkomuviðvörun í gær eftir lokun markaða. Hafa bréf félagsins hækkað um rúmlega 9% í um 467 milljóna króna viðskiptum í dag.
Í tilkynningunni sem var send á Kauphöllina í gær kom fram að útlit væri fyrir að hagnaður fyrir skatta og fjármagnsliði yrði 3,1 til 3,3 milljarðar í stað 2,8 til 3 milljarða eins og áður hafði verið gert ráð fyrir. Ástæða þess er sögð vera meiri sala á eldsneyti og þannig hafi sala á þotueldsneyti og olíu til erlendra skipa verið meiri en áætlað var. Þá segir að útlitið fyrir seinni hluta ársins sé betra en gert hafði verið ráð fyrir.
Árshlutareikningur fyrir fyrri hluta ársins verður birtur eftir lokun markaða á þriðjudaginn í næstu viku.