Fjárfestingar Orkuveitur Reykjavíkur verða auknar um samtals tvo milljarða á árinu 2020 til þess að bregðast við þeim afleiðingum sem Covid-19-faraldurinn hefur fyrir atvinnulífið. Árið 2021 verða þær auknar um allt að fjórum milljörðum.
Það var á stjórnarfundi í dag sem ákveðið var að ráðast í þessar aðgerðir og með þeim „vill OR sýna samfélagslega ábyrgð í verki og auka fjárfestingar í verkefnum sem hafa mikil áhrif í samfélaginu með það að leiðarljósi að viðhalda atvinnustiginu í landinu“, segir í tilkynningu.
Veitur, eitt dótturfyrirtækja OR, hafa undanfarið skilgreint verkefni sem gætu komið til greina sem viðbótarverkefni 2020 en gert er ráð fyrir því að framkvæmdir við veitukerfin verði uppistaðan í þeim fjárfestingarverkefnum sem ráðist verður í. Lagt er upp með að verkefnin verði mannaflsfrek og að þau verði sem víðast á starfssvæði Veitna.
Stjórn samþykkti einnig að leggja til við aðalfund OR að hækka arðgreiðslu til eigenda (sem eru sveitarfélögin Reykjavíkurborg, Borgarbyggð og Akranesbær) sem gert hafði verið ráð fyrir í fjárhagsspá, úr 1.750 milljónum króna í 3.000 milljónir króna sem jafngildir um 1,6% af eigin fé í árslok 2019.
Fyrirséð er að auknar fjárfestingar, arðgreiðslur og verri efnahagshorfur almennt muni auka fjármögnunarþörf OR, segir í tilkynningunni. Því var samþykkt að auka heimild til fjármögnunar í formi skuldabréfaútgáfu, víxlaútgáfu eða bankalána úr 13 milljörðum króna, samkvæmt áður birtri fjárhagsspá, í allt að 30 milljarða. Hluti aukinnar fjármögnunarheimildar er ætlaður til endurfjármögnunar á lánum sem eigendur OR veittu fyrirtækinu á árunum 2011 og 2013 sem hluta af aðgerðaáætlun OR og eigenda um viðbrögð við fjárhagsvanda OR, sem gekk undir nafninu Planið.