Sparar Reykjanesbæ um 200 milljónir árlega í 15 ár

„Þetta mun lækka fjármagnskostnað hjá okkur um hér um bil 200 milljónir á ári næstu 15 árin,“ segir Kjartan Már Kjartansson, bæjarstjóri Reykjanesbæjar, um endurfjármögnun á skuld sveitarfélagsins við Lífeyrissjóð starfsmanna ríkisins (LSR), en henni er nú lokið eftir að viðræður við Lánasjóð sveitarfélaga báru árangur.

Skuldin við LSR var 8,4 milljarðar til 25 ára og bar 4,2% vexti en lánin frá Lánasjóði sveitarfélaga bera umtalsvert lægri vexti.

„Lánin eru tekin í gegnum Lánasjóð sveitarfélaga með veði í útsvari. Þetta eru nokkur lán enda há upphæð og það eru mismunandi kjör á þeim. En vextir eru almennt í kringum 1,5%,“ segir Kjartan Már um nýju vaxtakjörin sem hafi jákvæð áhrif á rekstur sveitarfélagsins næstu ár.

„Við getum alveg notað 200 milljónir í viðbót á ári til margvíslegra annarra hluta en að borga vexti,“ segir Kjartan Már um ávinninginn í Morgunblaðinu í dag.

Viðtalið í heild í Morgunblaðinu.