Greiða gjöld viðskiptavina

Bílastæðaappið Parka hefur sett á markaðinn Parka Spons, en með því geta fyrirtæki greitt bílastæðagjöld viðskiptavina sinna.

Einnig er hægt að greiða stæðagjöld fundargesta í Parka Spons.

Arna Haraldsdóttir, markaðsstjóri Parka, segir þetta fara þannig fram að miðborgargesturinn skrái sig í stæði í appinu. Að loknum viðskiptum við fyrirtæki finnur hann það í appinu eða skannar QR-kóða og óskar eftir Sponsi. Fyrirtækið fær þá beiðni í Parka-viðmótið sitt og hafi gesturinn uppfyllt skilyrðin sem það setur getur fyrirtækið samþykkt beiðnina, eða hafnað eftir aðstæðum. „Þessi þjónusta gefur fyrirtækjum tækifæri til að ná til gesta sem hingað til hafa veigrað sér við að koma í miðbæinn til að versla og er á sama tíma ný leið í þjónustu og markaðssetningu,“ segir Arna.