Það er alltaf jafngaman að sjá hvernig arkitektar innrétta heimili sín. Þegar arkitektinn fær fullkomlega frjálsar hendur og þarf bara að berjast við eigið sjálf, ekki að uppfylla kröfur annarra, þá gerast kraftaverkin eins og sést í þessu húsi sem Pitsou Kedem arkitekt hannaði fyrir sig og fjölskyldu sína. 

Húsið er í Ramat HaSharon í Ísael og er útkoman þannig að hjartað tekur aukaslag. Allavega hjá þeim sem hafa áhuga á flotuðum gólfum, opnum rýmum og skósíðum gluggum. Þarfir fjölskyldunnar eru í forgrunni og er hægt að labba beint út í garð úr stofunni og eldhúsinu. 

Gluggatjöld eru ekki að þvælast fyrir og heldur ekki mikið af óþarfa prjáli. Húsið er samt alveg hlýlegt því djúsí sófar njóta sín í stofunni og í sjónvarpsherberginu og svo er töluvert af mottum sem gera mikið fyrir rýmið.