Við Laufásveg í Reykjavík stendur eitt glæsilegasta hús landsins. Innréttingar frá Poliform prýða húsið sem var allt tekið í gegn á síðustu árum.
Smartland Mörtu Maríu sagði frá því í ágúst 2013 að Skúli Gunnar Sigfússon, oft kenndur við Subway, væri búinn að setja glæsihús sitt á sölu. Í dag er Skúli reyndar ekki sjálfur skráður fyrir húsinu heldur dótturfélag hans, Sjöstjarnan ehf. Það félag eignaðist húsið 27. mars 2014. Nú er húsið komið aftur á sölu.
Húsið er einstakt á allan hátt. Það er teiknað af Sigurði Guðmundssyni árið 1927 og eru allar innréttingar frá Poliform sem er ítalskt innréttingafyrirtæki sem framleiðir innréttingar fyrir ríka fólkið úti í heimi. Steinninn á borðplötunum er frá Fígaró og eru uppþvottavélar og ofnar frá Siemens en ísskápurinn er frá Liebherr.
Gólfefnin í húsinu eru annars vegar basalt og hins vegar eikarparket lagt í fiskibeinamynstur með ramma utan um hvert rými. Parketið er sérunnið þannig að það líti út fyrir að vera gamalt og er olíuborið frá framleiðanda með 20 ára ábyrgð. Tæki á baðherbergjum eru innbyggð og eru þau frá Axor.
Fasteignamat hússins er tæplega 140 milljónir.
HÉR er hægt að skoða það nánar.