Verð á húseignum þykir hátt ef það fer yfir 100 milljónir. Nú er ein dýrasta íbúð landsins komin á sölu en á hana eru settar litlar 211 milljónir og þá á eftir að innrétta hana því íbúðin er tilbúin undir tréverk eða svo.
Íbúðin er 256 fm að stærð og er í blokk sem byggð var 2014. Íbúðin er þakíbúð með glæsilegum þakgarði með trylltu útsýni yfir Reykjavík, Esjuna og sundin blá. Allur helsti lúxus er til staðar í íbúðinni eins og hiti í gólfi. Í íbúðinni eru síðir gluggar og eru ofnar ekki að þvælast fyrir þar.
Skuggahverfið hefur notið mikilla vinsælda en þangað sækist vel efnað fólk í að búa þegar það minnkar við sig – nú eða stækkar við sig eins og gæti átt við í þessu tilfelli.
Við Lindargötu 39 eru nokkrir þekktir íbúar. Sigurður Gísli Pálmason, fjárfestir og pabbi Gísla Pálma rappara, á íbúð í húsinu og líka Ursus Maritimus Investors sem er í eigu Sigurðar Arngrímssonar fjárfestis. Fjárfestingafélagið Akureyrin á nokkrar íbúðir í húsinu og einkahlutafélagið Aleppo á íbúð í húsinu.
HÉR er hægt að skoða íbúðina betur.