Í Los Altos Hills í Kaliforníu hefur arkitektastofan Malcolm Davis Architecture hannað guðdómlegt einbýlishús. Húsið er eins og H í laginu ef það er skoðað úr lofti. Stórir gluggar einkenna húsið en það er opið og bjart. 

Það sem vekur athygli er eldhúsið og þá sérstaklega liturinn á innréttingunni sem er ljósblár. Það er óvenjulegt að fólk þori að hafa innréttingar sínar í slíkum litum en eins og sést á þessu eldhúsi ætti fólk að gera miklu meira af því að hafa ljósbláar innréttingar. 

Innanhússarkitektinn Quinn Morgan sá um að hanna húsið að innan. Í eldhúsrýminu má til dæmis sjá arin á gluggaveggnum sem rammar þessa hlið hússins skemmtilega inn. Það hlýtur að vera svolítið næs að sitja í sófanum við arineld og horfa út í garð þar sem sundlaugin leikur stórt hlutverk og veröndin þar í kring.