Innanhússhönnuðurinn Sara Dögg Guðjónsdóttir er mikil smekkkona sem kann þá list að gera fallegt í kringum sig. Hún segist forfallinn skó- og kápusjúklingur en gengur þó sjaldan með skartgripi. Sara Dögg sat fyrir svörum.
Hvað gerir þú til að verðlauna þig?
„Skó- eða kápukaup verða oftast fyrir valinu ef ég vil gera vel við mig. Ég á ekki erfitt með að finna ástæðu til að verðlauna mig; alltaf næ ég að réttlæta neysluhyggjuna í sjálfri mér.“
Hvaða snyrtivöru gætir þú ekki verið án?
„Pro Longwear-hyljarinn frá Mac og Sensai-augabrúnablýanturinn bjarga mér hvað mest.“
Hvað er það síðasta sem þú keyptir og elskaðir?
„Heppnin var svo sannarlega með mér þegar ég rambaði inn á útsölu Epal á dögunum og við blasti gyllt hliðarborð frá HAY sem var greinilega ætlað mér. Það prýðir svo sannarlega heimilið.“
Áttu eftirlætis skartgrip eða
„Ég geng örsjaldan með skartgripi á mér, en Henry London-úrið mitt fær ávallt að fylgja mér. Fylgihlutur í uppáhaldi er Zara City Bag sem var búin að vera á óskalistanum lengi, lengi. Fann hana svo loksins í Barcelona.“
Hvaða smáforrit notar þú mest?
„Instagram hefur vinninginn. Það er mjög auðvelt að gleyma sér þar.“
Hvaða veitingastaður er í uppáhaldi?
„Slippurinn og GOTT í Vestmannaeyjum. Sæta svínið stendur upp úr hérna í bænum.“
Áttu þér uppáhalds listaverk eða húsgagn?
„Borðstofuborðið mitt frá VIGT, formfegurð upp á sitt besta. Svo er grái marmarinn á eyjunni minni lifandi listaverk sem ég get ekki hætt að dást að.“
Hver er eftirlætisborgin þín?
„Ég bjó í Flórens í tvö ár, hún verður alltaf í fyrsta sæti. Ég heimsótti svo Barcelona á þessu ári og varð heldur betur ekki fyrir vonbrigðum.“
Hver er besti minjagripur sem þú hefur tekið með þér heim úr ferðalagi?
„Marokkósk pulla fékk pláss í ferðatöskunni eftir yndislega viku í Marrakesh.“
Er eitthvað á óskalistanum?
„Ljós frá 101 Copenhagen sem kemur til landsins í október í Norr 11 lofar ansi góðu. Það er allavega komið efst á listann minn eins og er.“
Hvað gerir hús að heimili?
„Persónulegir munir og heildarhugmyndin sem endurspeglar húseigandann.“