Jón Gunnar Geirdal og Fjóla Katrín Steinsdóttir hafa sett íbúð sína við Rjúpnasali á sölu. Smartland fylgdist með því á sínum tíma þegar Arnar Gauti tók svefnherbergi þeirra í gegn en það var parketlagt og gert ansi huggulegt.
„Svefnherbergið þeirra var plain eins og svo mörg önnur og ákváðum við að gera það hlýlegt með smá twisti. Ég byrjaði á að parketleggja vegginn á bak við rúmið. Ég hef oft gert tilraunir með plastparketi frá IKEA og er það mjög auðvelt í uppsetningu hvort sem það er á gólf, loft eða veggi. Það setur skemmtilegan svip á bak við rúmið,“ sagði Arnar Gauti í samtali við Smartland.
Arnar Gauti kann að meta grásprengda litinn á parketinu. Og þegar búið var að parketleggja vegginn var farið í það að mála herbergið í gráum mjúkum tón. Það er að segja allt, nema loftið. Liturinn heitir Pigieon-gray og kemur úr Slippfélaginu. Liturinn sem Arnar Gauti valdi er með 15% gljáa en þó með mattri áferð.
Jón Gunnar og Fjóla fjárfestu í nýju rúmi frá Betra baki en það er í stærðinni 180X200 með svartklæddum botni.
Íbúðin sjálf er vel skipulögð og fín. Hún er 108 fm að stærð og stendur í húsi sem byggt var 2003. Eldhúsið er opið inn í stofu með fínni viðarinnréttingu og parket er á gólfum.