Sólveig Eiríksdóttir og dóttir hennar Hildur Ársælsdóttir halda úti uppskriftasíðunni Mæðgurnar, þar sem þær deila hollum og góðum uppskriftum með lesendum. Uppskriftin að þessari ómóstæðilegu hindberjatertu kemur frá mæðgunum.
Þegar mæðgurnar útbúa tertur nota þær oftast aðferðir sem eiga uppruna sinn að rekja til hráfæðis. Í hráfæðiskökugerð þarf yfirleitt bara að mauka hráefnið í matvinnsluvél, þjappa í form og kæla.
Þessi hindberjaterta með karamellu og súkkulaði er virkilega ljúffeng og falleg. Tertan geymist vel í frysti og því er upplagt að útbúa hana með góðum fyrirvara.
Tertan geymist vel í frysti.
Ljósmynd/Mæðgurnar
Hindberjaterta með karamellu og súkkulaði
Botninn
3 dl döðlur, smátt saxaðar
3 dl kókosflögur, þurrristaðar
3 msk. kakóduft
1 msk. kókosolía, fljótandi
¼ tsk. sjávarsaltflögur
1-2 msk. vatn
- Setjið allt hráefnið í matvinnsluvél og blandið saman þar til það myndar klístrað deig.
- Ef döðlurnar eru mjög þurrar er gott að leggja þær aðeins í bleyti fyrst.
- Þjappið niður í lausbotna form (u.þ.b. 23 cm í þvermál).
- Geymið í frysti á meðan fyllingin er útbúin.
Hindberjafylling
5 dl frosin hindber (látið þiðna yfir nótt í kæli)
2 ½ dl kasjúhnetur, lagðar í bleyti í 2 klst. (gerir 3 dl útbleyttar hnetur)
1 dl hlynsíróp eða önnur sæta
1 tsk. vanilluduft
1/8 tsk. sjávarsalt
1 ½ dl kaldpressuð kókosolía
- Takið hindberin út úr frystinum kvöldið áður og látið þiðna, t.d. inni í ísskáp.
- Setjið þiðin hindberin í blandara og blandið þar til þau verða að mauki.
- Hellið vatninu af kasjúhnetunum og setjið þær út í hindberjamaukið í blandaranum, ásamt hlynsírópi, vanillu og salti og blandið þar til blandan er orðin silkimjúk og fín.
- Bætið kókosolíunni út í og klárið að blanda.
- Setjið fyllinguna ofan á botninn og setjið kökuna inn í frysti svo hún stífni áður en þið setjið karamelluna út á.
Langbest er að nota form með lausum botni og ekki er verra ef hægt er að smella frá á hliðinni.
Ljósmynd/Mæðgurnar
Karamella
3 msk. möndlusmjör
1/3 dl kókosolía
½ dl sæta, t.d. hlynsíróp
1 tsk. sjávarsalt
- Setjið allt hráefnið í blandara og blandið vel saman.
- Látið stífna inni í ísskáp í 15 mínútur.
- Hellið í kökuformið, yfir hindberjafyllinguna.
Súkkulaði
50g (½ plata) 70% lífrænt og „fairtrade“-súkkulaði
- Bræðið súkkulaðið yfir vatnsbaði.
- Látið kólna aðeins, en ekki stífna.
- Setjið rendur eða punkta ofan á karamelluna og notið tannstöngul til að dreifa úr og gera skemmtilegt mynstur.
- Látið kökuna inn í kæli/frysti til að stífna.
- Tertan geymist best í frysti, ef ekki á að bera hana fram samdægurs.
- Ef kakan er geymd í frysti er gott að láta hana mýkjast við stofuhita í 10 mín. áður en þið skerið og berið fram.
- Ef kakan er geymd í kæli er hægt að taka hana beint út og bera fram.
- Mjög fallegt er að skreyta tertuna með ferskum berjum eða ávöxtum.
Njótið hvers bita.
Ljósmynd/Mægðurnar