Þegar fregnir bárust að því að uppáhaldið okkar Kolbrúnar Bergþórsdóttur, George Clooney, hefði hnotið um ástina og það væri brúðkaup í kortunum, ákváðum við að halda sérstaklega upp á daginn. Þetta var einhvern tímann í sumar og höfðum við háleitar hugmyndir um það hvernig kakan ætti að líta út. Úr var að bökuð var ekta gamaldags súkkulaðikaka á þremur hæðum með amerísku „frosting“.
Í dag rann svo stundin upp og undirrituð mætti með þriggja hæða brúðkaupstertu úr eigin smiðju. Fyrir svona stjörnupar eins og Clooney og Alamuddin dugði ekkert minna en nóg af sykri, smjöri og eggjum.
Starfsfólk mbl.is og Morgunblaðsins fagnaði með okkur Kolbrúnu og ekki er hægt að segja annað en veislan hafi vakið mikla kátínu meðal gestanna.