Mannstu eftir blikkandi dansgólfinu? Mannstu eftir Módel 79? Mannstu eftir Cuba Libre? Drakkstu romm í kók? Fólkið sem djammaði í Hollywood hélt endurfundi um helgina og var svona líka mikið stuð.
Hollywood-prinsinn Valþór Ólason skipuleggjandi Hollywood-endurfundanna segist hafa lofað fólki að halda slíkt ball fyrir fimm árum og var þetta bara liður í að standa við gefin loforð.
„Þetta er loforð sem ég lét út úr mér fyrir 5 árum til fólksins sem kom á Hollywood böllin á Broadway 2009 og 2010. Ég lofaði öðru eftir 5 ár og stóð við það. Ég notaði tækifærið og bauð öllum sem hafa aðstoðað mig með einhverjum hætti í kringum þetta og vinum í VIP fyrir partíi í Petersen svítunni áður en ballið hófst,“ segir Valþór. Í fyrirpartýinu var boðið upp á drykki í anda Hollywood-áranna eins og Cuba Libre, romm í kók og Screwdriver svo eitthvað sé nefnt. Hollywood-ballið sjálft fór svo fram í Gamla bíói og var dansað fram á rauða nótt við diskómúsík.