Litahópurinn Tákn og teikn opnaði glæsilega sýningu í Gerðubergi á dögunum. Á sýningunni begður fyrir letri af ýmsum stærðum og gerðum. Þar er handskrifað, tölvuritað, málað, krotað og párað með ýmsum verkfærum eins og pennum, pennslum, pappír, skurðhnífum, tölvum og tússi svo eitthvað sé nefnt.
Vel var mætt á opnunina en meðal gesta var Katrín Þorvaldsdóttir, dóttir Þorvaldar í Síld og fiski. Katrín hefur raðað sér á lista yfir hæstu skattgreiðendur landins og er ein efnaðasta kona Íslands.
Listahópurinn Tákn og teikn skipa átta myndlistar- og hönnunarmenntaðar konur, það eru þær Edda V. Sigurðardóttir, Elsa Nielsen, Friðrika Geirsdóttir, Helga Gerður Magnúsdóttir, Kristín Edda Gylfadóttir, Kristín Þorkelsdóttir, Sigríður Rún og Soffía Árnadóttir. Hópurinn var stofnaður fyrir ári síðan og hittist reglulega til að deila hugmyndum á skemmtilegum og faglegum forsendum, með það að markmiði að halda sýningar.
Fyrsta sýning hópsins „Leturverk” var haldin á Mokka á hönnunarmars 2016. Þó er það ekki endilega markmið að öll verk eða sýningarnar verði helguð letri. Hópurinn er fjölbreyttur og aldursbil félaga breitt sem og reynsla þeirra. Stóra sameiginlega áhugamál hópsins er hönnun og list og að nýta tækifærin til sköpunar.