Leikkonan Jennifer Aniston prýðir auglýsingar fyrir húðskrúbb frá merkinu Aveeno og hefur hlotið mikla gagnrýni fyrir. Ástæðan mun vera sú að skrúbburinn inniheldur litlar plastagnir sem skolast út í hafið við notkun skrúbbsins og eyðast seint upp.
Slíkar plastagnir eru tiltölulega algengar í snyrtivörum og finnast meðal annars í tannkremi og ýmsum húðskrúbbum. En ákveðin vitundarvakning hefur átt sér stað að undanförnu því þau áhrif sem plastið hefur á lífríkið í hafinu eru komin í ljós.
Aniston hefur meðal annars fengið það óþvegið á samfélagsmiðlum fyrir að vera talsmaður húðskrúbbsins. Eins tók ritstjóri tímaritsins Nature Aniston á teppið og sagði að hún ætti að skammast sín.
Þess má geta að Aveeno er í eigu snyrtivörurisans Johnson & Johnson. Talsmaður Johnson & Johnson hefur greint frá því að markmið þeirra sé að taka plastagnir úr öllum snyrtivörum merkisins fyrir lok árs 2017.