Þá má segja að Gwyneth Paltrow hafi klæðst íslenskri hönnun þegar hún mætti í fötum frá Galvan London á E!-sjónvarpsstöðina. Sólveig Káradóttir er listrænn stjórnandi merkisins og einn af eigendum þess. Hlutverk Sólveigar í fyrirtækinu er að flakka á milli hátískusýninga, fá innblástur og svo vinnur hún náið með hönnuði Galvan, Önnu-Christine Haas.
Galvan London sérhæfir sig í hönnun á síðkjólum og fínni fatnaði án þess að verðið sé óyfirstíganlega hátt. Sólveig og samstarfskonur hennar hafa verið duglegar að koma merkinu á framfæri og sýnt það á tískusýningum París og Lundúnum svo einhverjar sýningar séu nefndar. Fyrsta línan kom á markað fyrir ári og hefur merkið fengið töluverða athygli og vaxið jafnt og þétt.
Þetta er ekki í fyrsta skipti sem Gwyneth Palrow sést í fötum frá Galvan því fyrir tæpu ári sagði Sólveig í viðtali við Fréttablaðið að þær þekktu stílista hennar og hefðu verið duglegar að láta hana fá kjóla fyrir rauða dregilinn.
Merkið er meðal annars selt í Harvey Nichols, Brown, Bergdorf Goodman og Neiman Marcus svo einhverjar verslanir séu nefndar.